இந்தக் கல்விதான் இனிமேல் வேண்டும்
தமிழரும் தமிழும் தழைத்தினி தோங்கிட
இன்றைய குழந்தைக்கு இனிநாம் கொடுப்போம்
கற்றபடி நிற்கவும் கருதியதை இயற்றவும்
உற்ற கல்வியை உடனே கொடுப்போம்
ஐந்து வயதுவரை ஆடட்டும் பாடட்டும்
அதற்கேற்ற வழிமுறை அரசும் செய்யட்டும்
அறிஞர்கள் நிறைந்த அரசுப் பள்ளியில்
திறன்வளர் கல்வியை இயல்பறிந்து தருவோம்
இலவசக் கல்வியை எல்லார்க்கும் கொடுப்போம்
பணப்பயிர் செய்யும் பள்ளியை மூடுவோம்
பாபருடன் அக்பரைப் படித்தது போதும்
பாரதப் போரில் பெருஞ்சோ றிட்டதும்
பாரியுடன் கபிலர் பைந்தமிழ்ச் சான்றோர்
நேரிய வாழ்வை நிரல்படச் சொல்வோம்
மதுரைக் கோவிலும் மல்லைச் சிற்பமும்
கல்லணை முதலாய்க் கட்டிய முறையும்
பெரிய கோவிலும் பேரிசைத் தூணும்
கடல்கடந்து கம்போடிய நாட்டில் தானே
காசினி வியக்கும் கற்கோவில் தன்னை
கட்டிய தமிழன் கற்பனை வளத்தையும்
அரிய சிற்பம் அழகிய ஓவியம்
வந்த வழிமுறை வழுவாது உரைப்போம்
ஊருக்குச் சோறிடும் உழவின் முறையும்
பாருக்குப் பயன்படும் பற்பல பொருளையும்
வலவன் ஏவா வான வூர்தியும்
கலமும் கட்டக் கற்றே கொடுப்போம்
விளையாட்டு மைதானம் விரிவாய் இருந்தால்
வெள்ளியும் தங்கமும் வேண்டியது கிட்டுமே
அண்டத்தை ஆயும் அறிவியல் தன்னையே
தண்டமிழ் மொழியில் தேடித் தருவோம்
ஆத்திகம் நாத்திகம் அனைத்தையும் அகற்றி
சாத்திரத் தோத்திர சழக்கினை நீக்கியே
எல்லார்க்கும் தெய்வம் இயற்கை என்றே
தொல்காப்பி யமுரைத்த இல்வாழ்க்கை
முறையும்
வள்ளுவன் காட்டும் வாழ்வியல் நெறியும்
பள்ளிப் பருவத்தில் பாடமாய்த் தருவோம்
திரைகடல் ஓடியே திரவியம் தேடினும்
தரைவழி சென்றே தனம்பல நாடினும்
பைந்தமிழ்ப் பண்பினை மறவா திருக்க
இன்றைய குழந்தைக்கு இனிதாய்க் கற்பிப்போம்
புலவர்
ஆ.காளியப்பன்
9788552993
No comments:
Post a Comment