அடக்கம் உடைமை

                                     

                  அடக்கமுடைமை

பண்பான மனிதன் பாரினில் யாரெனில் 

    பணிவோ டடக்கம் பனிமொழி உடையான்

திண்ணிய மனமும் திடமான மெய்யும் 

    திக்காத நாவும் திசைமாறிச் செல்லாது

நண்ணிய வழியில் நாடியே உய்ப்பது

    நற்றமிழ் வள்ளுவன் நாட்டிய அறத்துள்

விண்ணினும் உயர்ந்து விளங்கு நல்லடக்கம்

   வேண்டிய பொழுது விரும்பிய நல்குமே

தருநிழல் தன்னில் தங்க வைப்பது

     அருநர கிடையே ஆழ்த்தா திருப்பது  

வருபொருள் தன்னைக் காப்பது  போல

      வருந்தியே காக்க ஆக்கமாம் அடக்கத்தை  

பொருப்பினைக் காட்டிலும் உயர்ந்து நிற்பது

      பொறுமையும் அடக்கமும் பொருந்தி நிற்பது

பொருள்தனைப் பெற்றவன் பணிதல் என்பது

      பொன்மேல் மெருகு பூசுவ தாமே 

உறுப்பைந்தும் உள்வாங்கும் ஆமைபோல் இப்பிறப்பில் 

     ஐம்பொறி தன்னை அடக்கி வாழ்பவன்

மறுபிறவி ஏழிலும் மகிழ்வோ டிருப்பான்

      மணமிகு சுவையோடு சொல்லினை அடக்கான் 

 செறுநர் பலராகிச் சீரழிந்து போவான்

      சினம்நீங்கி கற்றுணர்ந்து அடங்கியான் பிறவி

அறுத்து பேரின்பம் பெறுவதோ  டிப்புவியில்

      அல்லலின்றி அளவிலாப் புகழ்பெறு வானே.

   புலவர்.ஆ.காளியப்பன் எம்.ஏ;எம் எட்                  

முத்தம்மாள்நிலையம்                                                                                                                              பூலுவபட்டி (அஞ்) கோவை 6411௦1                                    அலைபேசி 9788552993                   

 

அணிஇலக்கணம்9-02-17

 

                     அணி இலக்கணம்                                     அணிபல வகைப்படும். அவற்றுள் பின்வருநிலை பற்றிப் பார்ப்போம்.

    பின்வருநிலை

முன்வரும் சொல்லும் பொருளும் பலவயிற்

பின்வரும் என்னிற் பின்வருநிலையே  (தண்டி அலங்காரம்42)

பின்வரு நிலை அணி மூன்று வகைப்படும்.1.சொல்பின் வருநிலை அணி

2. பொருள்பின் வருநிலை

3. சொற்பொருள் பின்நிலைவரு அணி

              சொல்பின் வருநிலை அணி

ஒரு செய்யுளில் ஒரே சொல் பலமுறை வந்தபோதும் ஒவ்வொரு இடத்திலும் வெவ்வேறு பொருளைத் தருவது சொல் பின்வருநிலை நிலைஅணி எனப்படும்                                                                   எடுத்துக்காட்டு நீ தப்புத் தப்பா எழுதினால் நான் தப்புவேன்

              அத்தப்பிலிருந்து நீதப்ப முடியாது.

இதில் தப்பு என்ற சொல் பலமுறை வந்துள்ளது.

தப்புத் தப்பா என்பதற்குப் பிழையாக என்றுபொருள்.

நான் தப்புவேன் என்பதற்கு நான் அடிப்பேன் என்று பொருள்.

நீ தப்பமுடியாது என்பதற்கு தப்பிக்க முடியாது என்று பொருள்.

   இவ்வாறு  செய்யுளில் ஒருசொல் பலமுறை வந்து ஒவ்வொரு இடத்தி என்று பொருள் லும் ஒவ்வொரு பொருளைத் தருவது சொல்பொருள் பின்வருநிலை அணி எனப்படும்                                                 எடுத்துக்காட்டுச் செய்யுள்

துப்பார்க்குத் துப்பாய துப்பாக்கித் துப்பார்க்கு

துப்பாய தூஉம் மழை.

இதில் துப்பு என்பது உண்,தூய்மையான, உணவு என்ற பல பொருள்களில் வந்துள்ளது. இவ்வாறு  வருவது சொல்பொருள் பின்வருநிலை அணி எனப்படும்.                                                         

2.பொருள்பின்வருநிலை அணி

  செய்யுளில் ஒரே பொருள்தரும்  பலசொற்கள் வருவது பொருள்பின்வரு நிலை அணி எனப்டும்.

 எடுத்துக்காட்டு.

      அவிழ்ந்தன தோன்றி அலர்ந்தன காயா

     நெகிழ்ந்தன நேர்முகை முல்லை—மகிழ்ந்திதழ்

     விண்டன கொன்றை விரிந்த கருவிளை

     கொண்டன காந்தள் குலை.

இதனுள் அவிழ்தல்,அலர்தல்,நெகிழ்தல்,விள்ளல், மலர்தல் என்ற எல்லாச் சொற்களும் மலர்தல் என்ற ஒரே பொருளையே தருகின்றன. இவ்வாறு செய்யுலில் ஒரே பொருளில் பலசொற்கள் வருவது பொருள் பின்வருநிலை அணி எனப்படும்.

              சொற்பொருள் பின்நிலைவரு அணி

ஒரு செய்யுளில் ஒரேசொல் திரும்பத் திரும்ப வந்தபோதும் எல்லா இடத்திலும் ஒரே பொருளைத்தருவது சொற்பொருள் பின்வருநிலை அணி எனப்படும்.

எடுத்துக்காட்டு

     உதவி வரைத்தன்று உதவி உதவி

     செயப்பட்டார் சால்பின் வரைத்து.

இதனுள் உதவி என்னும் சொல் பலமுறை வந்தும் எலலா இடத்திலும் உதவுதல் என்னும் ஒரே பொருளையே தருகிறது.

    ஒரு செய்யுளில் ஒரேசொல் திரும்பத் திரும்ப வந்தபோதும் எல்லா இடத்திலும் ஒரே பொருளைத்தருவது சொற்பொருள் பின்வருநிலை அணி எனப்படும். இப்பகுதி 10 ஐம் வகுப்பிற்கு 5 மதிப்பெண்ணும் 12 ஆம் வகுப்பிற்கு 4 மதிப்பெண்ணும் தருவினா.

குழந்தை

                குழந்தை

              இருவர் இன்பத்தால்

              பயிராய்விளைந்தது

              பார்த்தால் பரவசம்

 தொட்டால் சுகம்தரும்                                 

இன்பத்தைத் தருவது                                  

மழலையால் மகிழ்வித்து                    

மதுவாய் இருப்பது

மார்பு மைதானத்தில்

மயக்கி விளையாடுவது

குழறும் மொழியெல்லாம்

குழலோ யாழோ

சப்பாணி கொட்டுவது

மிருதங்கத் தட்டாகும்

தளர்நடை இடுவது

தங்கத்தேர் நகர்வது

உதட்டில் ஒட்டிய

பருக்கை எல்லாம்

பாற்கடல் அமுதாகும்

ஒருவிரல் பட்டாலே

உணர்ச்சிப் பெருக்கெடுக்கும்

கல்வி2

                                   

          வெள்ளையன் கல்வியை வெளியேற்றுவோம்

                விலங்கும் மனிதனும் வேறுபட்டு நிற்பது

                இலங்குநூல் கற்ற கல்வியால் தானே

                நடத்தையில் மாற்றம் நல்குவது கல்வியே

                கடமை கண்ணியம் கற்றுக் கொடுக்கும்

             தாய்மொழிக்கல்வியே தலையாய கல்வி                         
                 விழியாய் உயிராய் விளங்குவது தாய்மொழி

                 சுழியத்தில் தொடங்கி பிறையாய் வளைந்து

                 நின்றும் கிடந்தும் இருக்கும் அகரம்

                 உலக மொழிக்கே முதலெழுத் தானது

                 அறம்செய விரும்பென ஆரம்பித்த கல்வி

நீதியுரை வகுப்பால் நிறைவுபெற் றிட்டது

                 ஆங்கிலே யனுக்காய் ஊழியம் செய்யவே

ஆட்களைப் பிடித்தது மெக்கலே கல்வி

பள்ளியின் தேர்ச்சியும் பெற்றோர் ஆசையும்

பிள்ளையின் எண்ணத்தில் மண்ணைப் போட்டது

விரும்பியது படிக்க விடவேண்டும் குழந்தையை

மகிழ்ந்து செல்லும் மணவறை போல

நெகிழ வைக்கும் பள்ளிதான் இருக்கணும்

தாய்மொழிக் கல்வியோ தருவில் பழுத்தது

அடித்துப் பழுத்தது ஆங்கிலக் கல்வி

படித்துப் படித்தே பழக்கத்தில் வந்தது

அறம்செய விரும்பு ஆப்பிள் ஆனது

குருவே வணக்கம் குட்மார்னிங் ஆனது

பாதம் மறைக்கும் பாவாடை தாவணி

முட்டிக்கு மேல்வரை குட்டை ஆனது

கால்பொதி சூவும் கழுத்துப் பட்டையும்

வெப்ப நாட்டினில் வந்து புகுந்தது

காதைக்கை தொடுவதே கற்றிடும் வயதாம்

பித்தலாட்டக் கல்விதான் பெருகிப் போனதால்

பிஞ்சு வயதினில் நஞ்சினை ஊட்டினர்

தாய்ப்பாலை நிறுத்தித் தள்ளினர் பள்ளியில்

நாய்க்கால் சிறுவிரலாய் நெருக்கி அடைத்தனர்

பொதிமூட்டை ஆனதே புத்தகப் பைதான்

போகோவும் சுட்டியும் பொழுதுபோக் கானது

மைதானம் என்பது மறைந்தே போனது

விளையாட் டென்பது விரல்நுனிக்கு வந்தது

ஜல்லிக் கட்டும் சடுகுடு ஆட்டமும்

கிறங்க வைத்த கிரிக்கெட்டால் அழிந்தது

பள்ளி விளையாட்டு பழங்கதை ஆனது

புள்ளி விவரத்தை அள்ளிக் குவித்தனர்

உள்நாட்டில் வேலை ஒன்றுமே இல்லையென

வேலை தேடியே வெளிநாடு சென்றதால்

பாசம் என்பது நாசமாய்ப் போனது

அறநெறிப் பண்போ அற்றே போனது

புறப்பொருள் தன்னைப் போற்றி வாழ்ந்ததால்

மணவாழ்க்கை கூட பணவாழ்க்கை ஆனது

உணவு சமைப்பதும் மறந்தே போனது

மனைவியோ மலேசியா கணவனும் கனடாவில்

இன்றைய இல்வாழ்க்கை இப்படிப் போகுதே

                இன்றைய கல்வியின் இழிநிலை இதுவே